Шанхайскі глядач зможа ўбачыць дзве нядаўнія прэм’еры Рэспубліканскага тэатра беларускай драматургіі і Цэнтра беларускай драматургіі – аўтарскі праект “МАЙ ХОМЛЭНД” аб сваім месцы ў свеце і знакаміты “ВЕЧАР” паводле аднайменнай п’есы Аляксея Дударава.
Паказы спектакляў “МАЙ ХОМЛЭНД” і “ВЕЧАР” пройдуць у рамках Восеньскага фестывалю і Кітайскага Шанхайскага міжнароднага фестывалю мастацтваў. Рэспубліканскі тэатр беларускай драматургіі першы раз за сваю гісторыю прадставіць спектаклі ў Кітайскай Народнай Рэспубліцы. Таму для абедзвюх краін – гэта не проста паказы, а мастацкі мост паміж беларускай і кітайскай культурамі, магчымасць паказаць сэрца Беларусі праз спектаклі, а таксама сустрэць новых сяброў, што размаўляюць на розных мовах, але разумеюць адно аднаго мовай мастацтва.
Спектаклі РТБД адабраны для ўдзелу ў прэстыжным міжнародным фестывалі як прыклад сучаснай беларускай тэатральнай культуры, якая можа гаварыць з гледачамі на ўніверсальнай мове – мове сімвалаў, метафар і архетыпаў – мове тэатра.
“Я заўсёды ведала, што ў беларускага тэатра багатыя традыцыі. У тых спектаклях, што мы выбралі для паказу, я ўбачыла тое, што можа быць цікава нашаму гледачу. Так, мы гаворым на розных мовах, у нашых краін розны досвед і спадчына. Але менавіта культурны абмен умацоўвае паразуменне. Спадзяюся, прыезд РТБД стане пачаткам нашага доўгатэрміновага супрацоўніцтва з Беларуссю”, – дзеліцца праграмны дырэктар Хань Бао.
Калектыў выступіць у Маладым тэатры (“Theatre Young”). Гэта адзін з найважнейшых культурных цэнтраў Шанхая, які займаецца сучасным мастацтвам і кожны год прымае тэатральныя калектывы з усяго свету. З 25 лістапада па 7 снежня 2025 года мясцовы глядач зможа ўбачыць спектаклі “МАЙ ХОМЛЭНД” і “ВЕЧАР” на беларускай мове з кітайскімі і англійскімі субтытрамі.
У рамках фестывалю таксама пройдуць творчая сустрэча “Праца акцёра над роляй” з артысткамі тэатра Надзеяй Цвятковай і Ганнай Лебедзевай, акцёрска-рэжысёрскі майстар-клас “Псіхалагічны тэатр і біямеханіка: Станіслаўскі і Меерхольд” ад дырэктара тэатра і рэжысёра Святланы Навуменка, лекцыя “Беларускі тэатр: гісторыя і сучаснасць” ад кіраўніка Цэнтра беларускай драматургіі Анастасіі Васілевіч.
Партнёр паказаў – 