Сэнс: да і пасля
Ці бывала ў вас такое, што пасля спектакляў РТБД унутры застаецца ціхае рэха ад разнастайных эмоцый, пачуццяў, уражанняў, а сэрца шукае словы, каб іх выразіць?..
Нам падаецца, гэта і ёсць прыкмета сапраўднай сустрэчы з сабой і мастацтвам. У “ сезоне сэнсаў ” Рэспубліканскі тэатр беларускай драматургіі запускае ваш асабісты аўдыягід, каб дапамагчы кожнай вашай думцы, кожнаму тэатральнаму адчуванню, уражанню знайсці сваю форму.
Аўдыяпадкаст Жанны Гурынай “ Сэнс: да і пасля” – гэта ўнікальны праект, дзе мы даследуем эмацыйны і сэнсавы сусвет спектакляў РТБД праз прызму адчуванняў тых, хто іх стварае. Мы не даем адзнак і не разбіраем сюжэт. Наша задача – разам услухацца, угледзецца і выявціь тое, што застаецца за кулісамі: ціхія эмоцыі, патаемныя пачуцці, раптоўныя думкі, унутраныя інсайты і тыя самыя глыбінныя сэнсы, з якіх і ствараецца магія тэатра.
У кожным выпуску аўтар падкаста Жанна Гурына і асобы РТБД падчас шчырай, душэўнай размовы-медытацыі:
- даследуюць эмацыйную палітру: якое галоўнае пачуццё вядзе гледача праз увесь спектакль? Наколькі разнастайнымі могуць быць яго адценні для кожнага з нас?
- шукаюць унутраныя інсайты: які невідавчны сэнс акцёр/рэжысёр/драматург/мастак адкрыў для сябе падчас работы над спектаклем?
- ствараюць карту пачуццяў: што можна ўбачыць сэрцам і пачуць душой у знаёмых сцэнах?
- разважаюць над пытаннем “Для чаго?”: для чаго героі робяць той ці іншы выбар? Для чаго амаль кожны дзень у РТБД збіраюцца людзі – на сцэне і ў глядзельнай зале? Для чаго мы выходзім з тэатра іншымі?
Гэта падкаст-праваднік, які дапаможа вам не проста глядзець спектаклі, а пражываць іх на новым, больш глыбокім і ўсвядомленым, узроўні праз гісторыі, адчуванні і сэнсы тых, хто іх стварае.
Заставайцеся з намі, каб не прапусціць ніводнага выпуску. Слухайце нас “ да ” паходу ў тэатр, каб настроіцца, альбо “ пасля ”, каб абмеркаваць з намі самыя патаемныя ўражанні.
ВЫПУСК №1
Першым госцем сэнсавага падкасту стала Юлія Гружэўская. У гэтым выпуску Жанна разам з Юліяй перажылі, як нам падаецца, сапраўдную тэатральную алхімію, адправіўшыся ў падарожжа па сэнсавых лабірынтах спектакля “ Вось я і прыйшла! “ ролі Юліі Гружэўскай у ім і, канешне, па ўнутраных лабірынтах свядомасці самой Юліі.
Запрашаем да праслухоўвання, а таксама сумеснага адкрыцця сэнсаў!
І, канешне, заставайцеся з намі, шаноўныя, каб не прапусціць ніводнага выпуску. Слухайце нас “ да ” паходу ў тэатр, каб настроіцца, альбо “ пасля ”, каб абмеркаваць з намі самыя патаемныя ўражанні.
ВЫПУСК №2
У новым выпуску аўдыяпадкаста “Сэнс: да і пасля” Жанна Гурына стварыла для кожнага гледача асабісты інструмент — медытацыю-сунастройку на спектаклі РТБД.
Яе можна праслухоўваць ДА спектакля, каб стварыць уласны намер і адкрыць сэрца.
Да яе можна вяртацца ПАСЛЯ, каб раскласці па ўнутраных палічках уражанні, сэнсы і знайсці ўласныя адказы.
Гэта — ключ да таго, каб пераўтвараць наведванне тэатра з падзеі ў працэс, каб сапраўдныя эмоцыі і сэнсы кожнага гледача адкрыліся ў яшчэ большай сваёй глыбіні, значнасці і шматмернасці.
Прыемнага падарожжа!
І, канешне, заставайцеся з намі, каб не прапусціць ніводнага выпуску.