Андрэй Лабчэўскі – кампазітар, музыка, кіраўнік ансамбля “Dilizhans-jazz”. Напісаў музыку да легенды ў дзвюх дзеях “Ладдзя роспачы”, а таксама да вечара гарадскіх камедый “Заручыны”.
Скончыў Мінскае музычнае вучылішча, Беларускую дзяржаўную акадэмію музыкі і інш. Працаваў у якасці піяніста, клавішніка, аранжыроўшчыка ў ансамблі традыцыйнага джаза “Рэнесанс”. У якасці кампазітара супрацоўнічае з тэатрамі Беларусі, у тым ліку з Беларускім дзяржаўным маладзёжным тэатрам, Мінскім абласным драматычным тэатрам і інш.
“Ладдзя роспачы” – гэта спектакль-роздум. Нашы радасці і нашы злачынствы, любоў і здрада, мужнасць і страх – усё гэта пляце нябачнае павуцінне нашага лёсу. Ці працягваецца яно далей за межы жыцця?..
Рэжысёр Святлана Навуменка праз філасофскую прозу Уладзіміра Караткевіча распавядае пра ўнутраны свет чалавека, які стаіць на парозе паміж “тут” і “там”. І пытае: мы – стваральнікі свайго лёсу ці толькі акцёры ў п’есе, якую хтосьці напісаў для нас?
Чакаем вас 13 мая ў Цэнтральным Доме афіцэраў. Уваход – па квітках на спектакль.