27, 28 і 30 снежня на сцэне РТБД адбудзецца прэм’ера легенды ў дзвюх дзеях “Ладдзя роспачы” ў пастаноўцы Святланы Навуменка, прысвечаная 95-годдзю са дня нараджэння Уладзіміра Караткевіча.

РТБД запрашае гледачоў на вытанчаную і глыбокую сустрэчу з класікай. Майстэрскі погляд рэжысёра звяртаецца да аднаго з самых загадкавых і філасофскіх твораў аўтара, каб разам з пастановачнай камандай разабрацца ў таямніцах чалавечага лёсу.

Што, калі пасля апошняга ўздыху нас чакае не спакой, а люстэрка? Люстэрка, у якім – усё наша жыццё: кожны погляд, кожнае слова, кожны выбар. Менавіта гэтай вечнай тэме і гэтым вечным пытанням прысвечаны новы спектакль. Гэта не проста пастаноўка. Гэта глыбокія разважанні пра выбар, адказнасць і паслядоўнасць чалавечых учынкаў, якія плятуць нябачнае павуцінне лёсу.

“Ладдзя роспачы” – гэта спектакль-роздум, дзе сустракаюцца самыя рознабаковыя праявы чалавечай натуры: радасць і злачынства, любоў і здрада, мужнасць і страх. Рэжысёр Святлана Навуменка не проста распавядзе гісторыю, яна створыць на сцэне асяроддзе для дыялогу. Звяртаючыся да глыбокай, містычнай прозы Караткевіча, яна даследуе ўнутраны свет чалавека, які стаіць на парозе паміж “тут” і “там”. Хто мы: стваральнікі свайго лёсу ці толькі выканаўцы ролі ў п’есе, якую хтосьці напісаў для нас?

Сцэна РТБД ператворыцца ў метафарычную прастору глыбінных сэнсаў, дзе пластычныя, візуальныя і музычныя рашэнні дапамогуць кожнаму гледачу судакрануцца з моцнай гісторыяй пра лёс чалавека, унутраную барацьбу і сілу духу, а значыць, з самім сабой. 

Сапраўднай асновай і натхненнем спектакля сталі словы самога Караткевіча: “«Ладдзя роспачы», па-мойму, найбольш удалая спроба даць абагульнены характар беларусу, якому і чорт не брат, якога і смерць не палохае, які больш за ўсё любіць Радзіму, жыццё і весялосць і ні пры якіх абставінах не ўступіць у барацьбе за іх.”

Прэм’ерныя паказы спектакля “Ладдзя роспачы” – гэта больш чым тэатральная падзея. Гэта інтэлектуальнае, эмацыйнае і сэнсавае падарожжа, запрашэнне да сумеснага пошуку адказаў на пытанні, што хвалююць кожнага.  Прыходзьце, каб разам з РТБД зазірнуць у люстэрка чалавечага лёсу і, магчыма, знайсці там уласныя адлюстраванні, тэатральныя скарбы і каштоўныя асэнсаванні.

Падрабязней пра спектакль “Ладдзя роспачы” і бліжэйшыя паказы можна знайсці на старонцы спектакля.