РТБДом: ХХХ СЕЗОН.
ЛІСТАПАД
РТБД працягвае знаёміць вас са спектаклямі, якія ўжо не пабачыш на сцэне тэатра.
За 30 гадоў існавання РТБД, здаецца, сабраў выдатную калекцыю для вашых #сапраўдныхэмоцый.
На гэты раз прапануем вам 3 спектаклі на розны густ.
З 1 па 30 лістапада вы можаце паглядзець спектаклі “Каласы пад сярпом тваім” (запіс 2011 года), “Любоў людзей” (запіс 2016 года) і “Білет на брэсцкі цягнік” (запіс 2019 года). Кошт квіткоў 3 рублі.
“Каласы пад сярпом тваім”*. Хто мы? Адкуль… На чыіх плячах узраслі? Мы можам ганарыцца кожным кутком сваёй Радзімы! Пра нашы карані, нашу гісторыю, магутную культуру, мову, пра станаўленне маладой асобы будзе наш спектакль. Раман Караткевіча бязмежны. Мы ўзялі некаторыя старонкі, якія, спадзяемся, падштурхнуць да рамана нашага гледача. *Звярніце ўвагу, што запіс 2011 года. І спектакль здымаўся з 1 камеры. Таму якасць гука і відэа будзе адпаведнай. Але гэта вельмі каштоўны для нас спектакль-успамін. І, спадзяемся, для нашых гледачоў таксама.
СПАСЫЛКА
“Любоў людзей”. Таямнічая, амаль дэтэктыўная гісторыя з загадкавым забойствам і дзіўным каханнем здарылася ў глухім беларускім пасёлку ў сярэдзіне сямідзясятых гадоў мінулага стагоддзя. Іх трое. Два мужчыны і адна жанчына. І яшчэ Любоў. Нястрымная, дзікая, безаглядная і жорсткая. Такая яна Любоў Людзей. І хоць свет навокал запоўнены сябрамі-таварышамі, сваякамі і суседзямі, весялосцю і танцамі – іх на зямлі толькі трое. Трое перад абліччам смерці.
СПАСЫЛКА
“Білет на брэсцкі цягнік” – тролінг у адной дзеі. Вадзім – звычайны сучасны малады беларус. Ён шукае сваё месца ў жыцці, жыве з адчуваннем, што ўсё добрае і лепшае адбудзецца з ім не тут і не зараз, а толькі за мяжой, напрыклад, у Маскве. Там чакае яго прэстыжная праца, сапраўднае каханне і шмат надзей на лепшае жыццё. Здаецца, вось яно – здзяйсненне ўсіх яго мараў! Аднак на самой справе ўсё аказваецца зусім не так, як ён малюе ў сваіх фантазіях…
СПАСЫЛКА
Дзякуй, што застаецеся на хвалі сапраўдных эмоцый разам з РТБД! Мы рады быць побач з вамі ў любой кропцы свету!