РТБДом: XXX сезон. ЛЮТЫ-САКАВІК
Па шматлікіх заяўках гледачоў у лютым РТБД пакажа вашы любімыя спектаклі-эксперыменты ў відэафармаце.
З 1 лютага па 31 сакавіка прапануем разам атрымаць асалоду ад #сапраўдныхэмоцый анлайн пры праглядзе спектаклей “Бетон”, “Сіндром Медэі” і “Пелікан”. Кожны з іх – яскравы эксперымент і ўнікальны аўтарскі позірк на сучасны тэатр.
“Бетон” – візуальная паэзія
Тысячы і тысячы ўнутраных кіламетраў у надзеі збегчы ад кахання альбо ад яго адсутнасці…
Пошук паратунку ў тым жа, ад чаго бяжым…
Безнадзейная падобнасць да герояў старажытнагрэчаскага міфу пра Арфея і Эўрыдыку…
І сустрэча з адзінотай, змешчанай у адзіны гіганцкі абсалют холаду і бяздушнасці – у бетон.
“Сіндром Медэі” – трагедыя
“Усё, што мела я, злілося ў адным,
І гэта быў мой муж…”
Эўрыпід “Медэя”
Сюжэт Эўрыпіда актуальны і па сённяшні дзень. Змяняюцца толькі дэкарацыі жыцця і формы рэакцый.
Як чалавек жыве і будуе сваё жыццё ў межах жыцця іншага чалавека? Што ён адчувае пасля здрады ці страты? Што стаіць за яго ўчынкамі?
Сёння мы не паглыбляемся ў сутнасць псіхалагічнага выбуху: дастаткова, што ён адбыўся. Мы лёгка выносім свае вердыкты ў каментарыях у сусветнай павуціне, каб праз пару дзён забыцца на гэта і пераключыцца на чарговую гісторыю.
Павярхоўны позірк на этыкетку, паскораныя меркаванні і нежаданне зразумець іншага – трагедыя не толькі адной Медэі.
“Пелікан” – ода злачыннай жарсці
“Пелікан” – адна з пазнейшых камерных п’ес вялікага шведскага драматурга Аўгуста Стрындберга.
Галоўная гераіня Эліза – маці сямейства – пэўны час атаясамлівае сябе з пеліканам, прыгожай і загадкавай птушкай, якая, згодна з легендай, у бязвыхадных сітуацыях корміць сваіх дзяцей уласнай крывёю…
Толькі з пасмяротнага ліста бацькі дзеці даведваюцца пра жахлівы падман маці. Як жыць дзецям з гэтай праўдаю, і як гэта навіна паўплывае на лёс усяго сямейства?
Дзякуй, што застаецеся з намі на хвалі #сапраўдныхэмоцый!
Мы вельмі рады быць побач з вамі ў любой кропцы света.