РТБД працягвае знаёміць вас са знакавымі спектаклямі, якія ўжо не пабачыш на нашай сцэне.
Студзень 2022 года мы вырашылі прысвяціць даволі лірычным і вельмі розным творам. Напряцягу месяца вы зможаце паглядзець спектаклі “Неба ў дыяментах”, “Нязваны госць” і “Дзённік паэта”.

Нязваны госць (запіс 2016 года)
Сямейная меладрама 18+
З суседняга балкона ў кватэру, дзе знаходзіцца гераіня, трапляе невядомы мужчына, які ратуецца ад мужа сваёй палюбоўніцы. Яго заінтрыгавала новая незнаёмка. А, магчыма, і не зусім новая, і не зусім незнаёмка?..
СПАСЫЛКА

Неба ў дыяментах (запіс 2010 года)*
Па матывах твораў А. Чэхава Жанчына прагне кахання, прагне знайсці свайго, упэўненага і надзейнага Мужчыну. Але Мужчына, як вядома, зазвычай не гатовы да падобных прапазіцый… Нечаканы сінтэз сучаснай пластыкі, акцёрскай імправізацыі і арыгінальнай рэжысуры. Неадназначны, па-чэхаўску шчымлівы і вельмі пранікнёны спектакль.
*звярніце ўвагу, што запіс спектакля зроблены з адной камеры.
СПАСЫЛКА

Дзённік паэта (запіс 2015 года)
У цэнтры ўвагі гледачоў – Максім Багдановіч, “замалёўкі” з яго жыцця, узятыя з неапублікаванага раней інтымнага дзённіка. Якім быў сапраўдны Максім Багдановіч? Чым ён жыў? Пра што марыў? Як уяўляў сабе каханне?
Цікавая драматургічная задумка аўтара падзяляе дзеянне на дзве часткі. Першая з іх дэманструе гледачу жыццё паэта, падзеі, пачуцці і перажыванні, якія ён апісваў у сваім інтымным дзённіку. Другая частка знаёміць нас з лёсам гэтага дзённіка і выносіць на паверхню відавочныя адрозненні стаўлення да чалавечых каштоўнасцяў і шчырых, глыбокіх пачуццяў у нашы дні і стагоддзе таму. Дзякуючы пластычнаму рашэнню і музыцы, спектакль пагружае гледача ў свет самых тонкіх пачуццяў герояў.
СПАСЫЛКА

Дзякуй, што застаецеся на хвалі #сапраўдныхэмоцый нават анлайн. Гэта вельмі каштоўна для нас!