16 красавіка відэасэрвіс VOKA правядзе трансляцыю спектакля “Адамавы жарты” Рэспубліканскага тэатра беларускай драматургіі.  Прамы эфір пачнецца ў 19:00 па мінскім часе і будзе бясплатна даступны з любой кропкі свету.

Галоўныя героі пастаноўкі – муж і жонка, якія шмат у чым нагадваюць біблейскіх Адама і Еву. Яны маладыя, прыгожыя і вельмі працавітыя. Жывуць у любові і згодзе, старанна вядуць хатнюю гаспадарку. Але адкуль ні вазьміся да іх заяўляецца Чорт…

Спектакль “Адамавы жарты” ідзе на сцэне тэатра з 2010 года і да гэтага часу застаецца адным з самых папулярных. Пастаноўка Святланы Навуменка створана паводле твораў Францішка Аляхновіча і Леапольда Родзевіча. У спектаклі пераплецена рэальнае і фантастычнае, натуральнае і карыкатурнае, сучаснае і старажытнае, выкарыстоўваецца шмат музыкі, пластыкі і, вядома, жартаў.

Шматкамерная мастацкая здымка ў высокай якасці дасць магчымасць кожнаму гледачу максімальна пагрузіцца ў атмасферу тэатральнай залы і ўбачыць усё, што адбываецца на сцэне, з розных ракурсаў.

Далучыцца да прагляду можна ў дадатку VOKA альбо па спасылцы. Паказ працягвае серыю трансляцый, якія відэасэрвіс VOKA праводзіць з Рэспубліканскага тэатра беларускай драматургіі.