Спектакль створаны ў 2023 годзе рэжысёрам Аленай Зміцер паводле апавядання Уладзіміра Караткевіча “Карней – мышыная смерць”, а таксама ўрыўкаў з празаічных твораў пісьменніка, яго вершаў і эсэ.
“Карней” – гэта спектакль, у якім галоўным прадметам даследавання становіцца Дом. Дом як сімвал, як пачуццё, як сувязь з роднай зямлёй, як злучальнае звяно пакаленняў, досведаў, часоў і выпрабаванняў.
Галоўны герой Карней – мясцовы пацукалоў, неадназначны, дзівакаваты чалавек, якога любяць усе дзеці і, як потым выяўляецца, усе мышы. Ён марыць аб Доме, шукае яго – сваё месца. Аднак, калі знаходзіць, здараецца страшнае… Вайна, перад тварам якой чалавек, як і ўсё жывое, – вельмі хісткая, крохкая істота, дробязь, пясчынка. Як, сутыкнуўшыся з такой дадзенасцю, такой рэчаіснасцю, засцерагчы, адстаяць, абараніць сімвал сувязі з роднай зямлёй, родам – свой Дом?..
XXVIII Міжнародны тэатральны фестываль “Белая вежа” пройдзе ў Брэсце з 10 па 15 верасня 2024 года. У фестывалі возьмуць удзел калектывы з 9 краін свету: Беларусі, Азербайджана, Польшчы, Казахстана, Расіі, Даніі, Узбекістана, Таджыкістана, Туркменістана.