“Трыццаты сезон. Асобы” – пад такой назвай 24 жніўня прэм’ерным спектаклем “Калека з вострава Інішман” стартуе юбілейны тэатральны сезон у Рэспубліканскім тэатры беларускай драматургіі.

Канцэпцыя юбілейнага сезона будуецца на гісторыях тых і пра тых, хто ствараў Рэспубліканскі тэатр беларускай драматургіі напрацягу 30 гадоў і хто стварае яго па сённяшні дзень. Гэта сторытэлінг ад імя кожнага ўдзельніка тэатральнага працэса: акцёра, рэжысёра ці гледача, адміністратара ці бутафора, мастака ці светатэхніка. РТБД перакананы: тэатр – гэта не толькі спектаклі, гэта асобны жывы арганізм, які функцыянуе дзякуючы людзям, іх таленту, светаадчуванню, багаццю поглядаў і меркаванняў.

Захаваць памяць пра людзей і іх справу, падмацаваць калектыўнае адчуванне адзінай мэты, дзеля якой працуе ўвесь тэатральны механізм, – важныя задачы сезона.

У творчых планах тэатра – цікавыя эксперыменты, прэм’ерныя спектаклі, удзел у фестывалях і гастролях, а таксама цёплыя шчырыя сустрэчы.

З 24 жніўня ў арт-холе РТБД будзе працаваць выстава макетаў сцэнаграфіі Юрыя Саламонава і эскізаў касюмаў Алены Iгрушы. Кожны жадаючы зможа здзейсніць своеасаблівае падарожжа па спектаклях: нешта ўбачыць упершыню, дзесьці пазнаць любімага персанажа, пра штосьці цёпла і з усмешкай панастальгіраваць.

Рэспубліканскі тэатр беларускай драматургіі, Міжнародная канфедэрацыя тэатральных саюзаў (Расія) і Рэгіянальны грамадскі фонд падтрымкі “Міжнароднага тэатральнага фестывалю ім. А. П. Чэхава” (Расія) рыхтуюць ка-прадукцыю – пастаноўку па п’есе “Камень глупости” сучаснага беларускага драматурга Канстанціна Сцешыка, лаўрэата міжнародных драматургічных конкурсаў і тэатральных фестываляў. Рэжысёрам спектакля выступіць малады пастаноўшчык з Екацярынбурга Дзмітрый Зімін (Расія), уладальнік прэмій за лепшую рэжысуру і стваральнік больш чым за 20 спектакляў па сучаснай і класічнай драматургіі і прозе. Прэм’ера спектакля “Камень глупости” запланавана на канец сакавіка 2022 года, прэзентацыя праекта ў гарадах Расіі – май-чэрвень 2022 года.

1 чэрвеня 2022 года – у Міжнародны дзень аховы дзяцей – у РТБД адбудзецца прэм’ера спектакля са сцэнаграфіяй, створанай на аснове дзіцячых эскізаў. У верасні 2021 г. пройдзе набор у праект, у рамках якого напрацягу верасня і кастрычніка дзеці 4-10 гадоў будуць ствараць сцэнаграфічныя вобразы да казкі. Займацца з імі будуць мастак Алена Ігруша, рэжысёр Яўгенія Давідзенка і актрыса Анастасія Баброва. На аснове дзіцячых малюнкаў Алена Ігруша распрацуе сцэнаграфію да спектакля, які паставіць Яўгенія Давідзенка.

Таксама Рэспубліканскі тэатр беларускай драматургіі прадоўжыць сваё супрацоўніцтва з Яўгенам Карнягам, аўтарам і рэжысёрам такіх спектакляў РТБД, як “Бетон”, “Шлюб з ветрам” (сааўтар – Кацярына Аверкава).

На пачатак тэатральнага сезона ўжо запланаваны гастролі на Волкаўскі тэатральны фестываль (г.Яраслаўль, Расія) са спектаклем “Профіт”, Міжнародны тэатральны фестываль “Белая Вежа” (г.Брэст, Беларусь) і фестываль “Балтыйскі дом” (г.Санкт-Пецярбург, Расія) са спектаклем “Шлюб з ветрам”, а са спектаклем “А мне не соромна!..” у снежне Тэатр прыме ўдзел у Маладзёжнам тэатральнам форуме (г.Ташкент, Узбекістан).

Рэспубліканскі тэатр беларускай драматургіі чакае ўсіх аматараў і сяброў у юбілейным трыццатым сезоне ў абноўленай глядзельнай зале – тым самым месцы, дзе акумулюецца жывая энергія, нараджаюцца шчырыя перажыванні і #сапраўдныяэмоцыі.

“Трыццаты сезон. Асобы” ў РТБД абяцае быць сапраўды асобым.