Як прырода размалёўваецца новымі фарбамі пры змене пор года, так і ў руках мастачкі ніці пераплятаюцца і злучаюцца, ствараючы незвычайныя ўзоры, а спіцы становяцца чароўнымі палачкамі. Пража літаральна ажывае і ператвараецца ў карціны.
Работы Надзеі запрашаюць да сузірання далікатнай, эфемернай прыгажосці імгненняў жыцця. Сплятаючы ніткі розных колераў, мастачка прапануе нам паэтычнае, летуценнае бачанне свету. Тэхніка інтарсіі, дасканала засвоеная мастачкай, дапамагае ствараць кампазіцыі, у якіх колеры дапаўняюць і адцяняюць адзін аднаго.
На выставе вы зможаце здзейсніць падарожжа па месяцах года, знайсці прысвячэнні майстрам сусветнага жывапісу і натхніцца разнастайнасцю жаночых вобразаў. Пераплятаючы ніці ў карцінах, тэмы работ і сэнсы, Надзея Раўтовіч нагадвае: усё геніяльнае – проста, нават калі гэтая прастата толькі здаецца такой.
Выстава “Ніці і поры года: вязаныя метамарфозы” – ода творчасці і цярпенню, запрашэнне запаволіцца і ацаніць прыгажосць вязанага мастацтва.
Выставу можна паглядзець па 15 сакавіка 2025 года.
Уваход на выставу вольны. Час працы:
Чацвер-субота: 14:00-18:00
Па квітках на спектаклі тэатра – згодна квітку на спектакль.