Кожнаму з нас час ад часу хочацца стаць чараўніком і здзейсніць які-небудзь цуд. Асабліва пад Новы год і Каляды. Рэспубліканскі тэатр беларускай драматургіі дорыць вам такую магчымасць і запрашае вас стаць Добрым чараўніком ці Чараўніцай. 

Так бывае, што не ў кожнага дзіцяці ёсць шанец пайсці ў тэатр. І моцнае жаданне сусрэцца з любімай казкай, на жаль, не супадае з абставінамі. Але разам мы можам перамагчы іх. І зрабіць гэта вельмі проста. 

Купіце квіток на навагоднія спектаклі РТБД у касе тэатра, назавіце сваё імя ці прадстаўцеся так, як вам захочацца, і пакіньце набытыя квіткі ў “Скрыні дабра”. 

РТБД гарантуе, што набытыя вамі квіткі будуць перададзены ў сацыяльныя ўстановы Мінска і Мінскай вобласці (дзіцячы Хоспіс, дзіцячыя дамы і інтэрнаты, тэрытарыяльны цэнтры сацыяльнага абслугоўвання насельніцтва і г.д.) для дзяцей, якія не могуць наведаць тэатр без нашай з вамі дапамогі. 

Справаздачу аб Добрых чараўніках і людзях, якім будуць перададзеныя квіткі, мы будзем публікаваць на нашым сайце! 

Падчас навагодніх мерапрыемстваў у РТБД дзетак чакае “Навагодняя вандроўка ў Парыж”, сапраўдная французская дыскатэка з Дзедам Марозам і Снягуркай і, канешне ж, падарунак-сюрпрыз. 

Рабіць добрую справу так проста! 
Дадатковая інфармацыя па тэл.: (029) 154-04-44